სიახლეები:

სიახლეები:

22.04.2008

თავისუფალი და სამართლიანი არჩევნების უწყებათაშორისი სამუშაო ჯგუფის წევრების,საქართველოს იუსტიციის მინისტრის ნიკა გვარამიას და რეგიონალური მართვის საკითხებში საქართველოს სახელმწიფო მინისტრის ბატონი დავით ტყეშელაშვილის განცხადება

პატიცემულო მეგობრებო,

გაცნობებთ, რომ საარჩევნო კამპანიის დაწყებასთან დაკავშირებით ჩვენს მიერ მიღებულ იქნა გადაწყვეტილება ჯგუფის დატოვებასთან დაკავშირებით. აღნიშნული გადაწყვეტილება ნაკარნახევია იმით, რომ ჩვენ, როგორც პოლიტიკური თანამდებობის პირებს, რომლებსაც კანონმდებლობით არ ეკრძალება წინასაარჩევნო კამპანიაში მონაწილეობა, მიგვაჩნია, რომ ჯგუფში ჩვენმა წევრობამ შეიძლება კითხვები გააჩინოს ჯგუფის საქმიანობის მიუკერძოებლობის მიმართ. ზემოთქმულიდან გამომდინარე, რათა არ დაირღვეს ჯგუფის მუშაობის უმნიშვნელოვანესი პრინციპი - მიუკერძოებლობა, კამპანიის ოფიციალურად დაწყებიდან (21 აპრილიდან) ვტოვებთ სამუშაო ჯგუფს.

ვიმედოვნებთ, ჯგუფის მუშაობა წარმატებულად გაგრძელდება და მნიშვნელოვნად შეუწყობს ხელს ქვეყანაში სამართლიანი და თავისუფალი არჩევნების ჩატარებას.

07.04.2008

არასამთავრობო და საერთაშორისო ორგანიზაციებთან, აგრეთვე სახალხო დამცელის აპარატის წარმომადგენლებთან თავისუფალი და სამართლიანი არჩევნების უწყებათაშორისი სამუშაო ჯგუფის პირველი სამუშაო შეხვედრა შედგა
პირველი შეთანხმებული ინიციატივები

7 აპრილს თავისუფალი და სამართლიანი არჩევნების უწყებათაშორისი სამუშაო ჯგუფის პირველი სამუშაო შეხვედრა გაიმართა. შეხვედრაში მონაწილეობა მიიღეს არასამთავრობო (“საქართველოს ახალგაზრდა იურისტთა ასოციაცია”, ”სამართლიანი არჩევნებისა და დემოკრატიის საერთაშორისო საზოგადოება”  “საერთაშორისო გამჭირვალობა”, “ახალი თაობა, ახალი ინიციატივა”) და საერთაშორისო ორგანიზაციების (ეუთო-ს მისია საქართველოში, ამერიკის ეროვნულ დემოკრატიული ინსტიტუტი, ამერიკის საელჩო),  აგრეთვე სახალხო დამცველის აპარატის წარმომადგენლებმა. შეხვედრაზე იმსჯელეს იმ ინიციატივებზე, რომლებიც ხელს შეუწყობენ თავისუფალი და სამართლიანი არჩევნების გარემოს შექმნას. კერძოდ, მიღწეულ იქნა შეთანხმება, რომ თავისუფალი და სამართლიანი არჩევნების უწყებათაშორისი სამუშაო ჯგუფი შემდეგი რეკომენდაციებით მიმართავს საქართველოს ცენტალურ საარჩევნო კომისიას:

- არასამთავრობო ორგანიზაციებთან თანამშრომლობით შემუშავდეს ინსტრუქცია ადმინისტრაციული რესურსების გამოყენებასთან დაკავშირებით. მნიშვნელოვანია, რომ ინსტრუქცია გასაგები იყოს იურიდიული განათლების არმქონე პირებისთვისაც. შემუშავებულ ინსტრუქციას ექნება პრაქტიკული დანიშნულება და გავრცლდება საჯარო მოხელეთა შორის. 

- არასამთავრობო ორგანიზაციებთან თანამშრომლობით შემუშავდეს ინსტრუქცია გასაჩივრების პროცედურასთან დაკავშირებით, რომელიც სქემატურად ჩამოაყალიბებს გასაჩივრების ინსტანციებსა და ვადებს. ინსტრუქცია მნიშვნელოვანია იმისათვის, რომ  ყველა დაინტერესებული სუბიექტი წინასწარ გაეცნოს გასაჩივრებასთან დაკავშირებულ ყველა პროცედურულ საკითხებს და თავიდან იქნას არიდებული განსხვავებული ინტერპრეტაციები.

შეხვედრაზე იმსჯელეს საქართველოს სახალხო დამცველის მიერ 2008 წლის 4 აპრილს 5 იანვრის არჩევნებთან დაკავშირებით გავრცელებული განცხადების თაობაზე. იუსტიციის მინისტრმა ნიკა გვარამიამ განაცხადა, რომ უწყებათაშორისი სამუშაო ჯგუფი გამოხატავს დაინტერესებას ამ საკითხის მიმართ და  მიუხედავად იმისა, რომ შესაბამისი მასალები არც იუსტიციის სამინისტროში და არც უწყებათაშორის სამუშაო ჯგუფში არ წარმოდგენილა, იგი მოუწოდებს ინფორმაცია გადაეგზავნოს საქართველოს გენერალურ პროკურატურას რეაგირებისათვის.

შეხვედრის შემდეგ გამართულ ბრიფინგზე იუსტიციის მინისტრმა ნიკა გვარამიამ არასამთავრობო ორგანიზაციების წინადადების საფუძველზე თხოვნით მიმართა გენერალურ პროკურატურას მოხდეს საზოგადოების ინფორმირება  საპრეზიდენტო არჩევნების პროცესში მომხდარ დარღვევებზე რეაგირების თაობაზე. მინისტრმა თავის მხრივ, უწყებათაშორისი სამუშაო ჯგუფის სახელით საზოგადოებას გააცნო შეხვედრის შინაარსი. აღინიშნა, რომ საზოგადოების ინფორმირებულობის უზრუნველყოფა საარჩევნო პროცესთან დაკავშირებულ საკითხებზე სამუშაო ჯგუფის ერთ-ერთ მნიშვნელოვან მიმართულებას წარმოადგენს, რადგან გამჭვირვალობა დემოკრატიული საარჩევნო გარემოს უზრუნველყოფის ძირითადი გარანტია.

14.04.2008

14 აპრილს შედგა  უწყებათაშორისი სამუშაო ჯგუფის შეხვედრა არასამთავრობო (“საქართველოს ახალგაზრდა იურისტთა ასოციაცია”, ”სამართლიანი არჩევნებისა და დემოკრატიის საერთაშორისო საზოგადოება”  “საერთაშორისო გამჭირვალობა”, “ახალი თაობა, ახალი ინიციატივა”)  და საერთაშორისო ორგანიზაციების (ამერიკის ეროვნულ დემოკრატიული ინსტიტუტი, საერთაშორისო რესპუბლიკური ინსტიტუტი, ევროპის საბჭოს სპეციალური წარმომადგენელი საქართველოში),  ამერიკის საელჩოს წარმომადგენლებთან. შეხვედრას აგრეთვე დაესწრნენ ცენტრალური საარჩევნო კომისიის თავმჯდომარე ბ-ნი ლევან თარხნიშვილი და სამოქალაქო რეესტრის სააგენტოს ხელმძღავნელი ბ-ნი გიორგი ვაშაძე.

შეხვედრისას წარიმართა მსჯელობა არასამთავრობო ორგანიზაციებისა და ცენტრალური საარჩევნო კომისიის მიერ ადმინისტრაციული რესურსების გამოყენებისა და საარჩევნო პროცედურის მარეგულირებელი ნორმების განმარტების მიზნით ინსტრუქციის შემუშავების თაობაზე. აღინიშნა, რომ ადმინისტრაციული რესურსების მარეგულირებელი ნორმების ინტერპრეტაციასთან დაკავშირებით თითქმის ყველა საკითხზე მიღწეულია შეთანხმება, თუმცა ცალკეულ საკითხებთან დაკავშირებით მიმდინარეობს დისკუსია და სავარაუდოდ მიმდინარე კვირაში დოკუმენტს ცესკო-სა და არასამთავრობო ორგანიზაციების მიერ მოეწერება ხელი. დოკუმენტის მიღება მით უფრო მნიშვნელოვანი და აქტუალურია, რომ იგი როგორც ყველა დონის საარჩევნო კომისიის წარმომადგენლებს, ისე საჯარო მოხელეებსა და ფართო საზოგადოებას დროულად უნდა მიეწოდოს.

საჩივრების მარეგულირებელი ნორმების განმარტებასთან დაკავშირებით არასამთავრობო ორგანიზაციებისა და ცესკო-ს წარმომადგენლები აგრეთვე შეთანხმდნენ, რომ ეცდებიან ამ კვირაში დაასრულონ დოკუმენტის შეჯერების პროცესი, რათა დოკუმენტი დროულად იქნეს გამოყენებული საარჩევნო კომისიაში მიმდინარე ტრენინგებისათვის.

შეხვედრაზე ხანგრძლივი დისკუსია წარიმართა საარჩევნო სიებთან დაკავშირებულ საკითხებზე. იუსტიციის მინისტრმა და სამოქალაქო რეესტრის ხელმძღვანელმა ცენტრალურ საარჩევნო კომისიასა და არასამთავრობო ორგანიზაციების წარმოამდგენლებს გააცნეს ცესკო-ს სიისა და სამოქალაქო რეესტრში არსებული სიების შედარების შედეგები და გამოვლენილი ხარვეზები.  ცენტრალური საარჩევნო კომისიის თავმჯდონარემ გამოთქვა მზაობა, რომ გამოვლენილი ხარვეზები უმოკლედ ვადაში იქნება აღმოფხვრილი.

შეხვედრაზე აგრეთვე იმსჯელეს 5 იანვრის კანონდარღვევებთან დაკავშირებით მიმდინარე გამოძიების, მათ  შორის სახალსო დამცველის განცხადებაში მოხსენიებულ კანონდარღვევებთან დაკავშირებით, განიმარტა, რომ დარღვევებთან დაკავშრებით მიმდინარეობს გამოძიება.

შეხვედრაზე აგრეთვე იმსჯელეს პარტიების ქცევის კოდექსის თაობაზე. აღინიშნა, რომ ამერიკის ეროვნულ დეკოკრატიულ ინსტიტუტსა და უწყებათაშორის სამუშაო ჯგუფს შორის შესაძლოა მოხდეს ქცევის კოდექსთან დაკავშირებით ინფორმაციის გაცვლა.

სიახლეები:

3.01.2008

საერთაშორისო დამკვირვებლები საქართველოში არიან

"მიუხედავად სახელმწიფოს ინიციატივისა, რომ არჩევნებისა და არჩევნების შედეგების გამოცხადების დღესთან დაკავშირებით შევთანხმდეთ თამაშის ერთიან წესებზე, სამწუხაროდ ჩვენ ისევ  გვესმის მუქარები და მოწოდებები ოპოზიციის მხრიდან საპრეზიდენტო არჩევნების შემდეგ მანიფესტაციების შესახებ.  ამდენად, კიდევ ერთხელ ვაცხადებთ, რომ  მუქარები და ქუჩაში გამოსვლის მოწოდებები არ უწყობს ხელს ჯანსაღი, კონკურენტუნარიანი საარჩევნო კლიმატის ჩამოყალიბებას." - განაცხადა 3 იანვრის პრეფ-კონფერენციაზე თავისუფალი და  სამართლიანი არჩევნების სამთავრობო ჯგუფის ხელმძღვანელმა  ეკა ტყეშელაშვილმა.

2.01.2008

არჩევნების დღეს პოლიტიკური ძალები ”თამაშის ერთიან წესებზე” უნდა შეთანხმდნენ

"სამართლიანი არჩევნების ჩასატარებლად სასიცოცხლოდ მნიშვნელოვანია არჩევნების დღეს საარჩევნო უბნებთან იყოს სიმშვიდე, რათა მოქალაქეებს მიეცეთ საკუთარი ნების თავისუფლად გამოხატვის საშუალება, აქეადნ გამომდინარე შეშფოთებას იწვევს პარტია "თავისუფლების" კანდიდატის მიერ წარდგენილი ინიციატივა საარჩევნო უბნებთან მოხდეს აქტივისტების მობილიზება თითქოსდა საარჩევნო უბნების დაცვის  მიზნით" - აღნიშნა 2 იანვარს გამართულ ბრიფინგზე თავისუფალი და სამართლიანი არჩევნების სამთავრობო ჯგუფის ხელმძღვანელმა იუსტიციის მინისტრმა, ეკა ტყეშელაშვილმა.

მინისტრი შეშფოთებას გამოთქვამს იმის გამო, რომ ეს ჩანაფიქრი, ერთი მხრივ, პირდაპირ გამოიწვევს საარჩევნო უბნებთან დაძაბულობის კერის შექმნას და მეორე მხრივ, ამომრჩევლებზე არამართლზომიერ გავლენას მოახდენს.

"ჩვენი წუხილი სრულად გაიზიარეს არასამთავრობო და საერთაშორისო სადამკვირვებლო ორგანიზაციებმა. მივესალმებით პრეზიდენტობის კანდიდატის მიხეილ სააკაშვილის ინიციატივას სიმშვიდის უზრუნველსაყოფად მოხდეს "თამაშის ერთიან წესზე" შეთანხმება. სამთავრობო ჯგუფი მზადაა პოლიტიკურ ძალებს შორის ასეთი შეთნხმების მისაღწევად კონსულტაციების ჩატარებისათვის ფორუმს უმასპინძლოს" - აღნიშნა სამთავრობო ჯგუფის ხელმძღვანელმა.
გარდა ამისა, ეკა ტყეშელაშვილმა არჩევნების სათანადო დონეზე ადმინისტრირების მნიშვნელობაზე ისაუბრა.

არჩევნების ადმინისტრირების სრულყოფის მიზნით ცენტრალურმა საარჩევნო კომისიამ მიიღი დადგენილება რომლითაც დამტკიცდა საუბნო კომისიის წევრების არჩევნების დღეს საარჩევნო პროცედურების ინსტრუქცია. თუმცა, სამთავრობო ჯგუფის არასამთავრობო ორგანიზაციის წევრებთან შეხვედრის შემდეგ ცხადი გახდა, რომ გარკვეული საკითხების უფრო ნათლად დარეგულრებისათვის საჭირო იყო ინსტრუქციაში დამატებითი დეტალების შეტანა.

"სამთავრობო ჯგუფის ინიციატივით გაიმართა შეხვედრა არასამთავრობო ორგანიზაციებს, ცესკო-ს თავმჯდომარესა და წევრებს შორის და გადაწყდა, რომ საუბნო და საოლქო კომისიებისათვის დამატებით შემუშავდება სახელმძღვანელო პრინციპები, რაც სრულყოფს ზემოაღნიშნულ პროცედურას". - აღნიშნა ეკა ტყეშელაშვილმა.

31.12.2007

ხმის მიცემის ფარულობა გარანტირებულია

თავისუფალი და სამართლიანი არჩევნების სამთავრობო ჯგუფის ხელმძღვანელმა, ეკა ტყეშელაშვილმა 31 დეკემბრის ბრიფინგზე ხმის მიცემის ფარულობაზე ისაუბრა. როგორც საკანონდებლო ისე პროცედურული სახის ყველა გარანტია არსებობს იმისათვის, რომ დაცული იყო თითოეული ხმის საიდუმლოება. საარჩევნო კაბინაში გადაღების ყოველგვარი ეჭვის გაქარწყლების მიზნით ცენტრალურმა საარჩევნო კომისიამ მიიღი გადაწყვეტილება იმის თაობაზე, რომ გადაეხურა საარჩევნო კაბინები. ამასთან, საარჩევნო უბნებზე საარჩევნო კომისიები უზრუნველყოფენ განცხადებების განთავსებას იმის თაობაზე, რომ გადაღება საარჩევნო კაბინაში აკრძალულია საქართველოს საარჩევნო კოდექსით. იუსტიციის მინისტრმა ზახი გაუსვა იმ გარემოებასაც, რომ საარჩევნო უბნებზე იქნება ჩვეულებრივი საწერი კალმები, რომლებიც არ ორთქლდება. ამდენად, საქართველოს მოქალაქეებს შეუძლიათ ჰქონდეთ ურყევი რწმენა იმისა, რომ მათი არჩევანი ფარული დარჩება.

28.12.2007

თავისუფალი და სამართლიანი არჩევნების სამთავრობო ჯგუფის ხელმძღვანელი, ეკა ტყეშელაშვილის 28 დეკემბრის ბრიფინგის თემა საარჩევნო კამპანიის პერიოდში მედიამონიტორინგი იყო. ”სამართლიანი და თავისუფალი არჩევნების ერთ-ერთი მთავარი განმსაზღვრელი ინდიკატორი კანდიდატებისათვის მედიის თანაბარი ხელმისაწვდომობაა.”- განაცხადა იუსტიციის მინისტრმა და ჟურნალისტებს აცნობა, რომ წინასაარჩევნო პერიოდში მედია მონიტორინგს სამი დამოუკიდებელი კერძო კომპანია ახორციელებს:

• პრაიმ თაიმი, ცენტრალური საარჩევნო კომისიის დაკვეთით
• მედია საბჭო და
• საერთაშორის გამჭვირვალეობა -საქართველოს და მედია ცენტრი გორბისთან თანამშრომლობით.

მეთოდოლოგიის კუთხით სამივე კვლევა მეტ-ნაკლებად მსგავსია და დაკვირვებას ახორციელებს ამა თუ იმ პოლიტიკური კანდიდატის ან მისი თანამოაზრეების მონაწილებას როგორც ბეჭდურ პრესაში, ასევე სატელევიზიო ეთერების საინფორმაციო გამოშვებებში და პოლიტიკურ თოქ შოუებში.

26-27 დეკემბერს გამოქვეყნდა სამივე მონოტირინგის მორიგი ანგარიში, რომელიც მოიცავდა 15-23 დეკემბრის (პრაიმ თაიმი 16-22 დეკემბერი, მედია საბჭო 15-23 ,TI და მედია ცენტრი 19 დეკემბრამდე ) პერიოდს.

იუსტიციის მინისტრის განცხადებით, ანგარიშის შედეგებიდან გამომდინარე შეიძლება დავასკვნათ, რომ

• კანდიდატებს სრული საშუალება აქვთ მედიაში წარმოაჩინონ მათი ხედვა და პოზიციები;
• სხვადასხვა პარამეტრებით და სხვადასხვა არხებზე პრეზიდენტობის სხვადასხვა კანდიდატი ლიდერობს მაგ. მედია საბჭოს შედეგების მიხედვით საპრეზიდენტო კანდიდატებისთვის დათმობილ საეთერო დროის მიხედვით ტელეკომპანია «რუსთავი-2»-ზე ამ პერიოდში ლიდერობს დავით გამყრელიძე – 2 საათი და 38 წუთი (9 525 წამი); ტელეკომპანია ”მზე”-ზე მიხეილ სააკაშვილი – 1 საათი და 51 წამი (3 651 წამი), ხოლო საზოგადოებრივ მაუწყებელზე - ლევან გაჩეჩილაძე 1 საათი და 41 წამი (3 641 წამი);
• საერთო სურათის მიხედვით საარჩევნო კამპანია კონკურენტუნარიან გარემოში მიმდინარეობს, ხოლო ზოგიერთი მედია მონიტორინგის შედეგების მიხედვით (პრაიმ თაიმი და მედია საბჭო) მისი გაშუქება დაბალანსებული და მრავალმხრივია;
• სატელევიზიო ეთერში გასული სიუჟეტების აბსოლუტური უმრავლესობა (97 %) ნეიტრალურია (გორბი).

27.12.2007

არჩევნებს 800 საერთაშორისო დამკვირვებელი დაესწრება

27 დეკემბერს თავისუფალი და სამართლიანი არჩევნების სამთავრობო ჯგუფის ხელმძღვანელმა, იუსტიციის მინისტრმა ქალბატონმა ეკა ტყეშელაშვილმა ბრიფინგზე 5 იანვრის ვადამდე არჩევნებზე საერთაშორისო დამვირვებლების მონაწილეობაზე ისაუბრა. მისი განცხადებით საერთაშორისო დამკვირვებლების მონაწილეობასთან დაკავშირებით შეინიშნება დადებითი დინამიკა, კერძოდ დღევანდელი ინფორმაციით 800 საერთაშორისო დამკვირვებელი დაესწრება აარჩევნო პროცესს. ამასთან, იუსტიციის მინისტრმა განაცხადა, რომ სახელმწიფო მიესალმება თუ დამატებით კიდევ სხვა საერთაშორისო დამკვირვებლებიც გამოთქვამენ საქართველოში არჩევნებზე დასწრების სურვილს.

ბრიფინგზე ეკა ტყეშელაშვილმა აღნიშნა, რომ თავისუფალი და სამართლიანი არჩევნების სამთავრობო ჯგუფსა და ეუთოს სადამკვირვებლო მისიას შორის მიმდინარეობს თანამშრომლობა დემოკრატიული არჩევნების უზრუნველყოფისათვის.

26.12.2007

ზემო აფხაზეთში საარჩევნო პროცესს პირველად საერთაშორისო  დამკვირვებლები დაესწრებიან
პირადობის მოწმობების დაჩქარებული წესით გაცემა

26 დეკემბერს თავისუფალი და სამართლიანი არჩევნების სამთავრობო ჯგუფის ხელმძღვანელმა, იუსტიციის მინისტრმა ქალბატონმა ეკა ტყეშელაშვილმა ბრიფინგი გამართა.

ბრიფინგზე მინისტრმა განაცხადა, რომ პირველად ნატო-ს წევრი ქვეყნების - ესტონეთის და გერმაანიის, ასევე ფინეთის  რეზერვის ოფიცერთა ასოციაციეების   შვიდი წარმომადგენელი საარჩევნო პერიოდის განმავლობაში ზემო აფხაზეთში არსებულ სიტუაციას დააკვირდება.  მონიტორინგი განხორციელდება 10 დღის განმავლობაში 29 დეკემბრიდან 7 იანვრამდე. ამ ადამიანებს აქტიური მონაწილეობა მიუღიათ კოსოვოს, ავღანეთის და სხვა  სამშვიდობო  მისიებში. იუსტიციის მინისტრის განცხადებით, საერთაშორისო დამკვირვებლების ყოფნა ზემო აფხაზეთში ძალიან მნიშვნელოვანია ყველა შესაძლო პროვოკაციის თავიდან აცილების თვალსაზრისითაც. ეკა ტყეშელაშვილმა  დიდი მადლობა გადაუხადა ნატო-ს წევრ სახელმწიფოებს ამ სახით არჩევნებში მონაწილეობისათვის.

25.12.2007

წინასწარ პატიმრობაში მყოფი პირების საარჩევნო უფლება გარანტირებული იქნება
მხოლოდ ერთი განაცხადი გარდაცვლილ პირზე

25 დეკემბერს თავისუფალი და სამართლიანი არჩევნების სამთავრობო ჯგუფის ხელმძღვანელმა, იუსტიციის მინისტრმა ქალბატონმა ეკა ტყეშელაშვილმა პრესკონფერენციაზე საზოგადოებას 2 ინფორმაცია გააცნო.

ცენტრალური საარჩევნო კომისიის გადაწყვეტილებით სასჯელაღსრულების დაწესებულებებში ყველა აუცილებელი ზომა იქნება მიღებული იმისათვის, რომ წინასწარ პატიმრობაში მყოფ პირებს სრულად მიეცეთ შესაძლებლობა მიიღონ მონაწილეობა არჩევნებში. ცესკო-ს გადაწყვეტილებით პროცესზე დაკვირვებას  როგორც ადგილობრივი, ისე საერთაშორისო დამკვირვებლები შეძლებენ.

19.12.2007

საარჩევნო სიებში  გარდაცვლილთა შესახებ მონაცემების გასწორება გაგრძელდება

19 დეკემბერს საქართველოს პრეზიდენტის მოვალეობის შემსრულებელი ნინო ბურჯანაძე, თავისუფალი და სამართლიანი არჩევნების სამთავრობო სამუშაო ჯგუფის წევრები და ცენტრალური სარჩევნო კომისიის თავმჯდომარე ლევან თარხნიშვილი შეხვდნენ არასამთავრობო ორგანიზაციების „სამართლიანი არჩევნების საერთაშორისო საზოგადოება“, საერთაშორისო გამჭვირვალობა“, ახალგაზრდა იურისტთა ასოციაციისა და „ახალი თაობა - ახალი ინიცატივა“ - წარმომადგენლებს.

შეხვედრაზე ისაუბრეს არასამთავრობო ორგანიზაციების, სამთავრობო სამუშაო ჯგუფისა და ცენტრალური საარჩევნო კომისიის თანამშრომლობის საჭიროებაზე. კონკრეტული თანამშრომლობის გზები გამოიკვეთა არჩევნებთან დაკავშირებული აქტუალური საკითხების თაოაბზე საზოგადოების ინფორმირების სფეროში. ცენტრალური საარჩევნო კომისია არჩევნების მიმდინარეობასთან დაკავშირებულ პრობლემურ საკითხებზე უზრუნველყოფს მოსახლეობისათვის განმარტებების მიწოდებას. არასამთავრობო ორგანიზაციები თავის მხრივ ასევე გეგმავენ საინფორმაციო კამპანიის განხორციელებას არჩევნების პროცედურასთან დაკავშრებით, რაც სამართლიანი არჩევნების ჩატარებას მნიშვნელოვნად შეუწყობს ხელს.
შეხვედრაზე დიდი დრო დაეთმო საარჩევნო სიებში არსებულ ხარვეზებზე საუბარს. დეტალურად იქნა განხილული პრობლემები სხვადასხვა ამომრჩეველთა ჯგუფებთან დაკავშირებით. არასამთავრობო ორგანიზაციების მხრიდან აღინიშნა, რომ ცესკო-ს მიერ ამომრჩეველთა სიების კარდაკარ გადამოწმების შედეგად სიები მნიშვნელოვნად გაუმჯობესდა და ამჟამად განგაშის საფუძველი არ არსებობს.

18.12.2007

საქართველოს მთავრობა მიესალმება ევროსაბჭოს ანგარიშს საქართველოში "დამოუკიდებლობის მოპოვების შემდეგ ყველაზე კონკურენტული არჩევნებისთვის” მზადებასთან დაკავშირებით

საქართველოს მთავრობა მიესალმება ევროსაბჭოს საპარლამენტო ასამბლეის მიერ 5 იანვრის საპრეზიდენტო არჩევნებისთვის მზადებასთან დაკავშირებით დღეს გამოცემულ ანგარიშს. ევროსაბჭოს საპარლამენტო ასამბლეის დელეგაციამ ხაზგასმით აღნიშნა, რომ ეს იქნება " საქართველოში დამოუკიდებლობის მოპოვების შემდეგ ჩატარებული ყველაზე კონკურენტული არჩევნები”. სრული ანგარიში შეგიძლიათ იხილოთ http://assembly.coe.int.

"მე, როგორც პარლამენტის თავმჯდომარე, განსაკუთრებით კმაყოფილი ვარ იმ ფაქტით, რომ ჩემი კოლეგები ევროსაბჭოს საპარლამენტო ასამბლეიდან საქართველოში დემოკრატიული პროცესების მონიტორინგში ასეთ მნიშვნელოვან როლს თამაშობენ” – განაცხადა საქართველოს პრეზიდენტის მოვალეობის შემსრულებელმა ნინო ბურჯანაძემ. "ჩვენ მივესალმებით ევროსაბჭოს გამოცდილებას თავისუფალი და სამართლიანი არჩევნების ჩატარებაში. მომდევნო კვირეების განმავლობაში ჩვენი მთავრობა მაქსიმალურად ფხიზლად იქნება იმის უზრუნველსაყოფად, რომ არჩევნები უმაღლესი დემოკრატიული სტანდარტების შესაბამისად ჩასატარდეს.“    

ევროსაბჭოს საპარლამენტო ასამბლეის წინასაარჩევნო მისიის მიერ მომზადებულ ანგარიშში აღნიშნულია, რომ "საქართველოს საარჩევნო კოდექსი წარმოადგენს სათანადო იურიდიულ საფუძველს დემოკრატიული არჩევნების ჩასატარებლად”,ასევე კოდექსში "შევიდა შესწორება, რის საფუძველზეც გათვალისწინებულ იქნა ოპოზიციის სურვილები”. სხვა ცვლილებებთან ერთად, შესწორებული კოდექსი უზრუნველყოფს ოპოციური პარტიების თანაბარ წარმომადგენლობას ცენტრალურ საარჩევნო კომისიაში, ამცირებს საპრეზიდენტო კანდიდატის წარდგენისთვის აუცილებელ ხელმოწერათა რაოდენობას, უზრუნველყოფს საპრეზიდენტო კანდიდატების თანაბარ ხელმისაწვდომობას მედიასთან და უფასო საეთერო დროს. ასევე ამცირებს პარლამენტში შესვლის ბარიერს 7%-დან 5%-მდე.

17.12.2007

საარჩევნო სიებში  გარდაცვლილთა შესახებ მონაცემების გასწორება გაგრძელდება

თავისუფალი და სამართლიანი არჩევნების სამთავრობო სამუშაო ჯგუფი

17 დეკემბერს თავისუფალი და სამართლიანი არჩევნების სამთავრობო სამუშაო ჯგუფის ხელმძღვანელმა, საქართველოს იუსტიციის მინისტრმა ეკა ტყეშელაშვილმა პრესკონფერენცია გამართა, რომელზეც საარჩევნო სიებსა და ხელისუფლების მხრიდან ზეწოლის ბრალდებების კონკრეტულ ფაქტზე იყო საუბარი.

ეკა ტყეშელაშვილის განცხადებით, სამოქალაქო რეგისტრაციის სააგენტოებში 22 დეკემბრამდე დარეგისტრირებული ინფორმაცია გარდაცვლილთა შესახებ ავტომატურ რეჟიმში გადაეცემა ცენატრალურ საარჩევნო კომისიას, რაც სიების სრულყოფას შეუწყობს ხელს. გარდაცვლილ პირთა შესახებ მონაცემის სიებში დარეგისტრირება შესაძლებელი იქნება არჩევნების დღესაც. ამასთან, იუსტიციის მინისტრმა ხაზი გაუსვა იმ გარემოებას, რომ საარჩევნო სიაში არსებული მცირე ხარვეზები არსებით საფრთხეს არ წარმოადგენენ არჩევნების სამართლიანად ჩატარებისათვის.

17.12.2007

თავისუფალი და სამართლიანი არჩევნების სამთავრობო სამუშაო ჯგუფის განცხადება

როგორც სამთავრობო სამუშაო ჯგუფმა გადამოწმების შედეგად დაადგინა, 13 დეკემბერს ხელვაჩაურის რაიონში ადგილი ჰქონდა ზეწოლას ერთ-ერთი სადამკვირვებლო ორგანიზაციის წევრზე ორი ადგილობრივი მოხელის მხრიდან.

ორივე მათგანი დათხოვნილ იქნა სამსახურიდან ადგილობრივ დამკვირვებელთან აგრესიული, ზეწოლის შემცველი საუბრის მიზეზით.

ეს არის ზეწოლის პირველი დადასტურებული შემთხვევა და რეაქცია ამ შემთხვევაზე არის სწრაფი და სამართლიანი.

თავისუფალი და სამართლიანი არჩევნების სამთავრობო სამუშაო ჯგუფი ადასტურებს საქართველოს მთავრობის ძალისხმევას მაქსიმალურად ხელი შეუწყოს 5 იანვრის არჩევნების დემოკრატიულად ჩატარებას. სამთავრობო სამუშაო ჯგუფი კვლავაც აქტიურად ითანამშრომლებს ქართულ და საერთაშორისო ორგანიზაციებთან, და დეტალურად შეისწავლის წინასაარჩევნო პროცედურებთან დაკავშირებულ ცნობებს.

ამასთან ერთად, სამთავრობო სამუშაო ჯგუფი ამახვილებს საზოგადოების ყურადღებას იმ გარემოებაზე, რომ გადამოწმების შედეგად შემოსული ცნობების აბსოლუტური უმრავლესობა  არ დადასტურდა.

ასე, მაგალითად 2007 წლის 10 დეკემბერს, ლეიბორისტული პარტიის წარმომადგენლებმა პაატა ჯიბლაძეს ტელევიზიით გააკეთა განცხადება, თითქოსდა ადგილი ჰქონდა გატაცებას და ზეწოლას ამ პარტიის წევრ ბექა შენგელიაზე. გაკეთებული განცხადების საფუძველზე, შინაგან საქმეთა სამინისტროში აღიძრა სისხლის სამართლის საქმე, რის საფუძველზეც დაიკითხა ბექა შენგელია, რომელმაც უარყო გატაცებისა და ზეწოლის ფაქტი.  შინაგან საქმეთა სამინისტრო ასევე დაუკავშირდა ბატონ ჯიბლაძეს და სთხოვა საქმის ირგვლივ არსებული დეტალების დაზუსტება. ბატონმა ჯიბლაძემ განაცხადა, რომ ის ვერ დაადასტურებდა ტელევიზიით გაკეთებული განცხადების სისწორეს.

17.12.2007

მჭიდრო თანამშრომლობაზე, ინფორმაციის დროულ გაცვლაზე, ყველა დარღვევაზე სწრაფ რეაგირებაზე, და შესაძლო დარღვევების პრევენციაზე შეთანხმდნენ ახლად დაფუძბებული სამთავრობო სამუშაო ჯგუფისა და ქართული არასამთავრობო ორგანიზაციები.

15 დეკემბერს პრეზიდენტის მოვალეობის შემსრულებელმა ნინო ბურჯანაძემ სამთავრობო ჯგუფი წარუდგინა იმ არასამთავრობო ორგანიზაციას, რომლებიც არჩევნების პროცესზე დაკვირვებას ახორციელებენ.

ქ-ნმა ნინო ბურჯანაძემ ისაუბრა საარჩევნო პროცესში არასამთავრობო ორგანიზაციების ჩართულობის მნიშვნელობაზე. შეხვედრაზე ხაზი გაესვა სადამკვირვებლო ორგანიზაციებისა და სახელმწიფო სტრუქუტრების თანამშრომლობის მნიშვნელობას. განხილულ იქნა თანამშრომლობის კონკრეტული მექანიზმები. ახალგაზრდა იურისტთა ასოციაციის თავმჯდომარე გიორგი ჩხეიძე მიესალმა სახელმწიფოს მზადყოფნას და მადლობა გადაუხადა შინაგან საქმეთ სამინისტროს წინასაარჩევნო პერიოდში დარღვევებთან დაკავშირებული ინფორმაციის დროული გამოქვეყნებისათვის. შეხვედრის მონაწილეები შეთანხმდნენ, რომ ყოვწელვირეული შეხვედრების რეჟიმში განაგრძობენ თანამშრომლობას.

შეხვედრაში მონაწილეობდნენ „სამართლიანი არჩევნების ააერთაშორისო საზოგადოება“, საერთაშორისო გამჭვირვალობა“, ახალგაზრდა იურისტთა ასოციაციისა და „ახალი თაობა - ახალი ინიცატივას“ წარმომადგენლები. 

17.12.2007

15 დეკემბერს საქართველოს პრეზიდენტის მოვალეობის შემსრულებელი ქალბატონი ნინო ბურჯანაძე შეხვდა ეუთოს სადამკვირვებლო მისიის ხელმძღვანელს ბატონ დიტერ ბოდენს.   შეხვედრა გაგრძელდა სადამკვირვებლო მისიის სხვა ხელმძღავანელებისა და თავისუფალი და სამართლიანი არჩევნების სამთავრობო სამუშაო ჯგუფის წევრების მონაწილეობით.

შეხვედრაზე ხაზი გაესვა ყველა სახელმწიფო სტრუქტურის მზადყოფნას ჩაატაროს დემოკრატიული არჩევნები. აღინიშნა წინასაარჩევნო პერიოდში თანამშრომლობის მნიშვნელობა, რათა წინასწარ იქნეს მიღებული ყველა ზომა შესაძლო დარღვევების პრევენციის მიზნით. სადამკვირებლო მისიის ხელმძღვანელი პირები და სამთავრობო ჯგუფის წევრები განაგრძობენ რეგულარულ შეხვედრებს საარჩევნო პროცესის დემოკარტიულად ჩატარების უზრუნველსაყოფად.

13.12.2007

სამუშაო ჯგუფი შეხვდა ეროვნულ დემოკრატიული ინსტიტუტის  პრეზიდენტ კენეტ ვოლაკს, საქართველოს ოფისის ხელმძღვანელს მერი ოჰაგანს და ორგანიოზაციის სხვა წარმომადგენლებს. შეხვედრაზე ისაუბრეს იმ ღონისძიებებზე, რასაც საქართველოს ხელისუფლება ახორციელებს 5 იანვრის სამართლიანი და თავისუფალი  არჩევნების უზრუნველსაყოფად. მხარეებმა გამოთქვეს  სურვილი მჭიდროდ ითანამშრომლონ არსებული გამოწვევების ეფექტურად დასაძლევად.

13.12.2007

სამთავრობო სამუშაო ჯგუფი არასამთავრობო ორგანიზაციების წარმომადგენლებს შეხვდა. კერძოდ, შეხვედრას ესწრებოდნენ "ახალგაზრდა იურისტთა ასოციაციის", "სამართლიანი არჩევნების და დემოკრატიის საერთაშორისო საზოგადოების", "საერთაშორისო გამჭვირვალობა - საქართველოს", ასევე "ახალი თაობა - ახალი ინიციატივის" წარმომადგენლები.

შეხვედრაზე არჩევნებთან დაკავშირებული საკითხები განიხილეს. ზემოაღნიშნულმა ჯგუფმა არასამთავრობო ორგანიზაციებს თანამშრომლობა შესთავაზა და გადაწყდა, რომ მსგავსი შეხვედრები რეგულარულად გაიმართება.

12.12.2007

საქართველოს პრემიერ მინისტრმა ლადო გურგენიძემ სამუშაო ჯგუფი წარუდგინა ეუთო-ს დამკვირვებელთა მისიის ხელმძღვანელს, ბ-ნ დიტერ ბოდენს. შეხვედრაზე განიხილულ იქნა არჩევნებთან დაკავშირებული აქტუალური საკითხები, მხარეებმა გაცვალეს ინფორმაცია არსებულ პრობლემებსა და მათ გადაწყვეტის გზებზე.