მიმდინარეობს ვებგვერდის განახლება

საქართველოს პრეზიდენტის ოფიციალური ვებგვერდი

პრესსამსახური   სიახლეები   ​სალომე ზურაბიშვილი: მოვიდა დრო, მოვითხოვოთ უფრო მეტი ჩვენი პარტნიორებისგან, რათა მათ გამოიყენონ საკ

​სალომე ზურაბიშვილი: მოვიდა დრო, მოვითხოვოთ უფრო მეტი ჩვენი პარტნიორებისგან, რათა მათ გამოიყენონ საკუთარი ბერკეტები

საქართველოს პრეზიდენტი სალომე ზურაბიშვილი ბერლინში გერმანიის ფედერალურ კანცლერ ანგელა მერკელს შეხვდა.
 შეხვედრისას განიხილეს საქართველოს ოკუპირებულ ტერიტორიებზე შექმნილი ვითარება, საქართველოს წინაშე მდგარი გამოწვევები და რუსეთის პოლიტიკა საქართველოს მიმართ.
როგორც პრეზიდენტმა შეხვედრისას აღნიშნა,  დღეს არსებული მდგომარეობიდან გამოსვლის ინსტრუმენტები საქართველოს არ გააჩნია და დამოკიდებულია მეგობრებზე, რათა მოახდინონ გავლენა და ზეწოლა რუსეთზე, რომ  მან საკუთარი პოზიციები შეცვალოს.
 ,,ჩვენი პოზიციაა - საქართველოს მეგობრები და პარტნიორები: გერმანელები, ფრანგები, ამერიკელები
უფრო აქტიურად ჩაერთონ დიალოგში, გაუმეორონ რუსეთს და როგორღაც გააგებინონ, რომ საჭიროა,  პოზიციები შეიცვალოს", - აღნიშნა სალომე ზურაბიშვილმა შეხვედრის დასრულების შემდეგ.
პრეზიდენტი მიიჩნევს, რომ დღეს ჟენევის  მოლაპარაკებების ფორმატი ძალიან ტექნიკურ დონეზე ჩამოვიდა.
 
,,ჩვენთვის უცვლელია ჟენევა, რადგან სხვა საერთაშორისო ფორმატი არ გაგვაჩნია, მაგრამ დრო მოვიდა, მოვითხოვოთ მეტი ჩვენი პარტნიორებისგან და მათ გამოიყენონ საკუთარი ბერკეტები.

როდესაც ჩვენ გვეკითხებიან: - რას გავაკეთებთ? ჩვენ ვპასუხობთ, რომ ვაკეთებთ იმას, რაც შეგვიძლია. ეს არის  პატარ-პატარა, ჰუმანიტარული ნაბიჯები, რათა არ გავწყვიტოთ კავშირი ოკუპირებულ ტერიტორიებზე მყოფ მოსახლეობასთან. თუმცა ეს ძალიან რთულია და  ვითარებას არ ცვლის", - განაცხადა საქრათველოს პრეზიდენტმა.
 
საქართველოს პრეზიდენტი ოფიციალური ვიზიტით ბერლინს დღეს ეწვია.
 პრეზიდენტის სახელმწიფო დელეგაციის შემადგენლობაში შედიან: საგარეო საქმეთა მინისტრი დავით ზალკალიანი, განათლების, მეცნიერების, კულტურისა და სპორტის მინისტრი მიხეილ ბატიაშვილი, პრეზიდენტის ადმინისტრაციის უფროსი ლაშა ჟვანია და ადმინისტრაციის უფროსის მოადგილე ნათია სულავა.

 

Add to Twitter Add to Facebook