მიმდინარეობს ვებგვერდის განახლება

საქართველოს პრეზიდენტის ოფიციალური ვებგვერდი

პრესსამსახური   სიახლეები   საქართველოს პრეზიდენტმა საფრანგეთის შინაგან საქმეთა მინისტრთან მიგრაციის საკითხები განიხილა

საქართველოს პრეზიდენტმა საფრანგეთის შინაგან საქმეთა მინისტრთან მიგრაციის საკითხები განიხილა

საქართველოს პრეზიდენტი სალომე ზურაბიშვილი, საქართველოში ოფიციალური ვიზიტით მყოფ, საფრანგეთის შინაგან საქმეთა მინისტრს, კრისტოფ კასტანერს შეხვდა.

შეხვედრისას საუბარი შეეხო საქართველოსა და საფრანგეთს შორის არსებულ ურთიერთობებს მიგრაციისა და ორგანიზებულ დანაშაულთან ბრძოლის სფეროში.
​საქართველოს პრეზიდენტმა აღნიშნა, რომ საქართველოს ხელისუფლება მუშაობს არალეგალური მიგრაციის შემცირების მიმართულებით, ამისათვის დიდი მნიშვნელობა აქვს მოსახლეობის ინფორმირებას შესაბამისი საინფორმაციო კამპანიების საშუალებით. საქართველოს და საფრანგეთის მხარის ერთიანი პოზიციაა, ყველაფერი გაკეთდეს უვიზო მიმოსვლის შეჩერების მექანიზმის თავიდან ასაცილებლად.
რაც ეხება ორგანიზებულ დანაშაულთან ბრძოლის მიმართულებას, აღინიშნა, რომ საქართველოსა და საფრანგეთის მთავრობებს შორის ორმხრივი თანამშრომლობა მიმდინარეობს, სისტემატიურ რეჟიმში ხდება ინფორმაციის გაცვლა, საქართველოდან საფრანგეთში პოლიციის ატაშეები გაიგზავნა.
შეხვედრაზე ისაუბრეს ასევე, საქართველოს პრეზიდენტის ინიციატივაზე, საქართველოში წლის ბოლოს მიგრაციის თემაზე კონფერენციის ჩატარების შესახებ, რომელიც პრეზიდენტმა ევროკომისარებთან: დიმიტრი აბრამოპულოსთან და ფედერიკა მოგერინისთან ბრიუსელში შეხვედრებისას განიხილა. აღინიშნა, რომ მნიშვნელოვანია ,,ცირკულარული მიგრაციის შესახებ" შეთანხმების ეფექტური იმპლემენტაცია იმ ქვეყნებთან, რომლებთანაც ეს ხელშეკრულება არსებობს, მათ შორის საფრანგეთთან. ამ მიმართულებით საგულისხმოა საპილოტე პროექტების განხორციელება, რაც ხელს შეუწყობს ქართველი სპეციალისტების გადამზადებას და პროფესიული კვალიფიკაციის ამაღლებას.
განიხილეს თავშესაფრის მაძიებელთა რიცხვის შემცირების საკითხები. საფრანგეთის შინაგან საქმეთა მინისტრმა აღნიშნა, რომ სამკურნალო მიმართულებით ჰუმანიტარული თავშესაფრის მოთხოვნასთან დაკავშირებით საკითხი შესწავლილია და აღსანიშნავია, რომ მკურნალობის სტანდარტებსა და სამედიცინო სერვისების ღირებულებას შორის სხვაობა (ონკოლოგიური დაავადების მიმართულებით) საფრანგეთსა და საქართველოში თითქმის არ არის.

Add to Twitter Add to Facebook